ចូលចិត្តទំនើប

ទៅស្គាល់សណ្ឋាគារប្រណិតៗជុំវិញពិភពលោក

ដោយ: ដួងច័ន្ទ 9 AM, Monday, 03 Sep, 2018

តើអ្នកចូលចិត្តជីវភាពរស់នៅបែបប្រណិត ចំណាយពេលវេលាសម្រាកលំហែដ៏រីករាយ និងរស់នៅពោរពេញដោយក្តីសុខមែនទេ? អញ្ចឹងអ្នកអាចចំណាយពេលអានអត្ថបទរបស់ ទំនើប ដែលនឹងនាំអ្នកទៅស្គាល់សណ្ឋាគារប្រណិតៗជុំវិញពិភពលោក។

Nayara Springs
ទទួលបានបទពិសោធន៍រស់នៅជាមួយព្រៃពិតៗ នៅក្នុងសណ្ឋាគារដែលសង់ឡើងស្ថិតនៅចំកណ្តាលបេះដូងនៃធម្មជាតិ។ រីករាយកំសាន្តជាមួយអាងហែលទឹកដ៏ធំ លាតសន្ធឹងចូលក្នុងព្រៃ ខណៈដែលអ្នកកំពុងហែលទឹក ឬសម្រាកនៅក្នុងទឹកថ្លាឆ្វង់ អ្នកនឹងបានទស្សនាទេសភាពធម្មជាតិ ដ៏ស្រស់ត្រកាល និងបក្សាបក្សីហោះហើរពីក្នុងព្រៃ។ អ្នកអាចរីករាយជាមួយការកំសាន្តនៅខាងក្រៅ ជាមួយការស្ប៉ា និងសូណា។ សណ្ឋាគារនេះមានស្ពានកម្ពស់ 76 ម៉ែត្រខ្ពស់កប់ចុងឈើ ដែលជាកន្លែងភ្ជាប់តែមួយគត់ពីសណ្ឋាគារទៅពិភពខាងក្រៅ។ អ្នកអាចស្រមៃអំពីភាពស្ងប់ស្ងាត់ និងសន្តិភាពដែលអ្នកអាចទទួលបាននៅទីនេះ។

Aria Hotel
នេះជាសណ្ឋាគារសង់ឡើងដើម្បីបង្កើតនូវបទពិសោធន៍ដ៏ថ្កុំថ្កើងនៃការរស់នៅក្នុងរាជវាំងហុងហ្គារី ដ៏អស្ចារ្យ ដែលសក្តិសមនឹងមនុស្សចូលចិត្តសិល្បៈ។ ការរចនាតុបតែងត្រូវបានធ្វើឡើងយកតម្រាប់តាមទស្សនទានតន្រ្តី ព្រមគ្នាជាមួយការផ្តល់នូវឯកជនភាព និងផាសុកភាព។ សណ្ឋាគារនេះមាន 4 ផ្នែកខុសៗគ្នា ចែកចេញជា The Classical Music Wing តុបតែងជាមួយចង្កៀងរំយោលកែវ និងគំនូរវីយ៉ូឡុងត្បាញ។ The Jazz Wing យកលំនាំតាមតារា Jazz របស់ហូលីវូដ ចាប់ពីពិដានតំរៀបថ្ម រហូតដល់តុសរសេរម៉ូដ Trunk-Style និងចំណាយពេលរាត្រីហ៊ុំព័ទ្ធទៅដោយតារាចម្រៀង Mile Davis និងគ្រែប្រភេទ B.B King។ The Opera Wing ជាបន្ទប់ស្នាក់បែបស៊ីវិល័យនៃការតុបតែងពីកញ្ចក់ Velvet និងការលាបពណ៌ដ៏ទាក់ទាញ។ The Contemporary Wing មានពណ៌ដ៏ភ្លឺចិញ្ចាច រចនាបទដ៏ស្រស់ស្រាយ និងមានគ្រែមានក្បាំងរចនាយ៉ាងពិសេស ដែលអ្នកអាចទទួលបានអារម្មណ៍ដូច Prince of Pop ឈរនៅកៀកបង្កើយ។

Riad Kniza
បើអ្នកធ្លាប់ទៅលេងប្រទេសម៉ារ៉ុក អ្នកនឹងមិនអាចស្វែងរកទីកន្លែងណាស្នាក់នៅល្អដូចនៅទីនេះឡើយ ដែលរចនាម៉ូដតុបតែងឡើងវិញជាមួយរសជាតិបែបបូរាណដ៏ប្រណិតនៃប្រពៃណីម៉ារ៉ុក រចនាពាសពេញផ្ទៃសណ្ឋាគារ។ បន្ថែមនូវសោភណ្ឌភាពដ៏អស្ចារ្យ អ្នកក៏នឹងបានភ្លក្សរសជាតិម្ហូបអាហារដ៏ឈ្ងុយឆ្ងាញ់នៅក្នុងបន្ទប់ Moroccan Saloon ដ៏កក់ក្តៅ ឬក្រោមពន្លឺព្រះចន្ទនៅក្នុង Roof Terrace។ នៅទីនេះមានតុតែ 9 ប៉ុណ្ណោះ ដែលធានាផ្តល់នូវបរិយាកាសដ៏ស្ងប់ស្ងាត់សម្រាប់អ្នក។

Mandapa, A Ritz-Carlton Reserve
សណ្ឋាគារនេះស្ថិតនៅលើកោះបាលី ដែលជាទីក្រុងនាំមកនូវភាពស្ងប់សុខ និងការសម្រាកលំហែ ដ៏ស្ងៀមស្ងាត់។ អ្នកនឹងទទួលអារម្មណ៍ដូចស្ថិតនៅក្នុងប្រាសាទបូរាណ និងទទួលបាននូវការសមាធិដ៏ស្ងប់សុខជាច្រើនប្រភេទ។ អ្នកអាចក្រេបរសជាតិភេសជ្ជៈ និងទស្សនាទេសភាពព្រៃប្រឹក្សានៅក្នុងវីឡាដាច់ដោយឡែកពីគ្នា ដែលមានសួនច្បារ និងអាងហែលទឹករៀងៗខ្លួន។ ឬអ្នកអាចទទួលទានអាហារក្រោមបរិយាកាសបែបប្រពៃណី ឬជ្រើសយកកន្លែងដាច់ពីគេនៅតាមមាត់ទឹក ឬ Lumbung ឬទស្សនាវាលស្រែ។

Hotel The Serras
អគារដ៏ប្រណិតសង់ឡើងតាំងពីឆ្នាំ 1846 ដែលជាស្នាដៃរបស់ស្ថាបត្យករតែមួយដែលសាងសង់ Placa Reial Francesc Daniel ដ៏ល្បីល្បាញក្នុងទីក្រុង Barcelona។ ហើយនេះក៏ជាកន្លែងតែមួយដែល Pablo Picasso ទទួលបាន Studio ដំបូងនៅក្នុងវ័យ 15 ឆ្នាំផងដែរ។ យើងអាចបរិយាយសណ្ឋាគារនេះតែត្រឹមពាក្យមួយមាត់គឺ សិល្បៈ។ វារចនានូវបទពិសោធន៍ដ៏ពិសេសនៃ Rooftop Terrace ការហែលទឹកក្រោមពន្លឺព្រះអាទិត្យ និងទស្សនាទេសភាពកំពង់ផែ Port Vell Marina រីករាយជាមួយភេសជ្ជៈនៅ Sky Bar នៅក្នុង Cocktail Pool និងទទួលទានអាហារដ៏ឆ្ងាញ់ពិសា។ លក្ខណៈដ៏ពិសេសគឺអ្នកនឹងទទួលបានអ្នកគ្រប់គ្រងមួយរូបផ្តល់នូវសេវាកម្មគ្រប់បែបយ៉ាងសម្រាប់ការស្នាក់នៅ។

Kandolhu Maldives
នេះជាវីឡាស្នាក់នៅចំនួន 30 ខ្នង ដែលរួមបញ្ចូលនូវធម្មជាតិ និងសម្រស់នៃការស្ថាបត្យកម្មទាន់សម័យ និងផាសុកភាព។ សណ្ឋាគារនេះសង់ឡើងនៅចុងកោះ ដែលមានឆ្នេរខ្សាច់នៅចំកណ្តាលផ្ទៃទឹកខៀវស្រងាត់ថ្លាឆ្វង់ និងកណ្តាលធម្មជាតិពណ៌បៃតង។ សណ្ឋាគារនេះមានភោជនីយដ្ឋាន 4 ប្រភេទខុសៗគ្នា និងមានជម្រើសកន្លែងស្នាក់នៅបែប Pool Villa, Ocean Villa ឬអាចយកបានទាំងពីរប្រភេទរួមបញ្ចូលគ្នា។ វាក៏មានសេវាកម្មកំសាន្តលើទឹកជាច្រើនទៀតផងដែរ។

Lindos Blu
វាត្រូវបានសាងសង់ឡើងដូចជា Amphitheatre នៅលើកូនភ្នំ ផ្តល់នូវទេសភាពឆ្នេរ Vicha Bay ដ៏ស្រស់ស្អាត។ វាជាសណ្ឋាគារថ្នាក់ផ្កាយ 5 ផ្តល់នូវការសម្រាកលំហែសម្រាប់តែមនុស្សវ័យជំទង់ប៉ុណ្ណោះ។ វាសាងសង់ឡើងជាមួយផ្លូវដើរឆ្ពោះទៅកាន់ឆ្នេរខ្សាច់ វីឡា និង Maisonetts ជាមួយនឹងអាងហែលទឹកផ្ទាល់ខ្លួន។ វាក៏មានភោជនីយដ្ឋានចំនួន 2 និង Penthouse Sun-Terrace ចំនួនមួយ។

Burj Al Arab Jumeirah
វាស្ថិតនៅក្នុងអគារមានរាងដូចក្តោងទូក ដែលជានិមិត្តរូបរបស់ទីក្រុង Dubai ដែលមានបន្ទប់ស្នាក់នៅចំនួន 202 បន្ទប់ ស្ថិតនៅលើកោះសិប្បនិមិត្តលាតសន្ធឹងចូលក្នុងឆ្នេរ Jumeriah និងភ្ជាប់ទៅនឹងដីគោកដោយស្ពានរាងកោង។ រាងរបស់អគារនេះមានលក្ខណៈពិសេសដាច់ពីគេ ព្រមជាមួយនឹងសេវាកម្មនៅទីនេះផងដែរ។ សណ្ឋាគារនេះផ្តល់នូវសេវាកម្មដ៏ប្រណិត ដែលផ្តល់ឱ្យអ្នកនូវឱកាសជិះទូក Submarine Voyage ដែលនាំអ្នកទៅពិសាអាហារក្នុងសណ្ឋាគារក្រោមផ្ទៃទឹក មានរថយន្ត Rolls Royces ចាំស្វាគមន៍ភ្ញៀវ ក៏ដូចជាឧទ្ធម្ភាចក្រផងដែរ។ ជញ្ជាំងសណ្ឋាគារប្រណិតជាមួយផ្ទាំងរូបភាពធ្វើពីសូត្រ និងមានស្លឹកឈើធ្វើពីមាសទម្ងន់ 24 carat គ្រប់ដណ្តប់លើផ្ទៃ 2,000 ម៉ែត្រក្រឡា។ កាន់តែអស្ចារ្យ អ្នកអាចក្រេបរសជាតិ Cappuccino រំលេចជាមួយមាសចាំងរំលេចផងដែរ៕

អត្ថបទអ្នកចង់អាន

  • ទិសដៅទេសចរណ៍ទាំង 8 ដែលមានតម្លៃសមរម្យបំផុត នៅជុំ...

    ដោយ: ភារុន 8 AM, Saturday, 10 Nov, 2018
    នៅថ្ងៃឈប់សម្រាកក្នុងឱកាសពិធីបុណ្យអុំទូកនេះ អ្នកអាចឆ្លៀតពេលនេះទៅធ្វើដំណើរទេសចរនៅតំបន់ដ៏ល្បីៗនៅជុំវិញពិភពលោក ប៉ុន្តែប្រសិនបើអ្នកមិនចង់ចំណាយថវិកាច្រើនក្នុងការធ្វើដំណើរទេសចរណ៍ អ្នកអាចពិចារណាទៅកាន់ទិសដៅទាំង 8 ដូចខាងក្រោមនេះដែលផ្តល់ឱ...
  • សារមន្ទីរដ៏ល្អបំផុតទាំង 5 នៅរាជធានីភ្នំពេញប្រទេ...

    ដោយ: ភារុន 8 AM, Tuesday, 06 Nov, 2018
    សារមន្ទីរជាច្រើននៅក្នុងរាជធានីភ្នំពេញផ្តល់ការយល់ដឹងដ៏គួរឱ្យចាប់អារម្មណ៍ស្តីអំពីវប្បធម៌ និង ប្រពៃណី ព្រមទាំងព្រឹត្តិការណ៍ផ្សេងៗដែលបានកើតឡើងនៅអតីតកាលរបស់ប្រទេសកម្ពុជា។ ខាងក្រោមនេះគឺជាសារមុន្ទីចំនួន 5 នៅក្នុងរាជធានីភ្នំពេញដែលផ្តល់...
  • រមណីយដ្ឋានលក្ខណៈឯកជន និង ដាច់ដោយឡែកដ៏ស្រស់ស្អាត...

    ដោយ: ភារុន 10 AM, Thursday, 08 Nov, 2018
    ខេត្តកំពត គឺជាខេត្តមួយដែលមានភាពល្បីល្បាញថានៅទីនេះសប្បូរអាហារសមុទ្រដែលមានរសជាតិឆ្ងាញ់បំផុត ជាងនៅតំបន់ផ្សេងៗទៀតដែលជាខេត្តជាប់សមុទ្រនៅប្រទេសកម្ពុជា។ ម្យ៉ាងទៀតនៅទីនេះក៏មានរមណីយដ្ឋានលក្ខណៈឯកជន និង ដាច់ដោយឡែកពីគេដែលត្រូវបានគេឱ្យឈ្មោះ...
  • ការបោះជុំរុំ និង ការដើរកម្សាន្តបែបផ្សងព្រេងនៅខេ...

    ដោយ: ភារុន 9 AM, Wednesday, 07 Nov, 2018
    ខេត្តមណ្ឌលគីរីតំបន់ទេសចរណ៍ធម្មជាតិដ៏ធំមួយនៃតំបន់ភូមភាគឥសាន្តរបស់ប្រទេសកម្ពុជា ដែលមានតំបន់ទេសចរណ៍ធម្មជាតិៗជាច្រើនកន្លែង។ នៅក្នុងឱកាសព្រះរាជពិធីបុណ្យអុំទូក អកអំបុក និងសំពះព្រះខែ នាពេលខាងមុខនេះ ជាឱកាសដ៏ល្អមួយដែលអ្នកអាចនាំគ្រួសារទៅ...